Email article
Breadcrumb
ഗോപ്യമായ ശിര്‍ക്ക്
ഗോപ്യമായ ശിര്‍ക്ക്
അല്ലാഹുവിന്റെ പ്രീതി മാത്രം കാംക്ഷിച്ചാണ് നാം സത്കര്‍മങ്ങളില്‍ നിരതരാവേണ്ടത്. എന്നാല്‍ പുണ്യകര്‍മം ചെയ്യുമ്പോള്‍ അത് മനുഷ്യരെകാണിച്ച് അവരുടെ തൃപ്തി ലഭിക്കണമെന്ന് ആഗ്രഹിക്കല്‍ ഗോപ്യമായ ശിര്‍ക്കാണെന്ന് നബി(സ്വ) പറഞ്ഞിട്ടുണ്ട്. അല്ലാഹു പറയുന്നു. ''അതിനാല്‍ വല്ലവനും തന്റെ രക്ഷിതാവിന്റെ കൂടിക്കാഴ്ചയെ ആഗ്രഹിക്കുന്നവെങ്കില്‍ അവന്‍ സത്കര്‍മം പ്രവര്‍ത്തിക്കട്ടെ. തന്റെ നാഥന്റെ ആരാധനയില്‍ ഒരാളെയും അവന്‍ പങ്ക് ചേര്‍ക്കാതിരിക്കുകയും ചെയ്യട്ടെ. (18:110) തഫ്‌സീര്‍റൂഹുല്‍ ബയാനിലും തഫ്‌സീര്‍റാസിയിലും ഈ ആയത്തിന്റെ അവതരണകാരണം വ്യക്തമാക്കുന്നത് ഇപ്രകാരമാണ്.
''ജുന്‍ദുബ്‌നു സുഹൈര്‍(റ) നബി(സ്വ)യോട് പറഞ്ഞു: തീര്‍ച്ചയായും ഞാന്‍ അല്ലാഹുവിനുവേണ്ടി ചില പുണ്യകര്‍മങ്ങള്‍ ചെയ്യും. എന്നിട്ട് ആരെങ്കിലും അത് കണ്ടാല്‍ എന്നെയത് സന്തോഷിപ്പിക്കും. അപ്പോള്‍ ഈ സൂക്തം (18:1120) അവതരിക്കപ്പെട്ടു.''.
അല്ലാഹുവിന്റെയടുക്കല്‍ നിന്നുള്ള പ്രതിഫലം ആഗ്രഹിക്കാതെ ജനങ്ങളെ കാണിക്കാന്‍ വേണ്ടി സമ്പത്ത് ചെലവഴിക്കുന്നവര്‍ക്ക് സംഭവിക്കാനിരിക്കുന്ന നഷ്ടം അല്ലാഹു ഉദാഹരണ സഹിതം ഇങ്ങനെ വ്യക്തമാക്കുന്നു:
സത്യവിശ്വാസികളേ, എടുത്തു പറഞ്ഞു കൊണ്ടും ശല്യമുണ്ടാക്കിക്കൊണ്ടും നിങ്ങള്‍ നിങ്ങളുടെ ദാനധര്‍മ്മങ്ങളെ നിഷ്ഫലമാക്കികളയരുത്. അല്ലാഹുവിലും പരലോകത്തിലും വിശ്വാസമില്ലാതെ ജനങ്ങളെ കാണിക്കാന്‍ വേണ്ടി ധനം ചെലവ് ചെയ്യുന്നവനെപ്പോലെ നിങ്ങളാകരുത്. അവനെ ഉപമിക്കാവുന്നത് മുകളില്‍ അല്പം മണ്ണ് മാത്രമുള്ള മിനുസമുള്ള ഒരു പാറയോടാകുന്നു. ആ പാറമേല്‍ ഒരു കനത്ത മഴ പെയ്തു. ആ മഴ അതിനെ ഒരു മൊട്ടപ്പാറയായിമാറ്റിക്കളഞ്ഞു. അവര്‍ അധ്വാനിച്ചതിന്റെ യാതൊരു ഫലവും കരസ്ഥമാക്കാന്‍ അവര്‍ക്ക് കഴിയുകയില്ല. അല്ലാഹു സത്യനിഷേധികളായ ജനതയെ നേര്‍വഴിയിലാക്കുകയില്ല. (2:264)
ഈ വിഷയകമായി നബി(സ്വ)യില്‍ നിന്ന് നിരവധി ഹദീസുകള്‍ ഉദ്ധരിക്കപ്പെട്ടിട്ടുണ്ട്. അബൂസഊദ്(റ) പറയുന്നു: ഞങ്ങള്‍ വ്യാജമസീഹിനെക്കുറിച്ച് പരസ്പരം സംസാരിച്ച്‌ കൊണ്ടിരിക്കെ ഞങ്ങളുടെ അടുത്തേക്ക് റസൂല്‍(സ്വ) കടന്നുവന്നു. എന്നിട്ട് അവിടുന്ന്‌ചോദിച്ചു. വ്യാജമസീഹിനേക്കാള്‍ കൂടുതലായി നിങ്ങള്‍ക്ക് ഞാന്‍ ഭയപ്പെടുന്ന കാര്യം പറഞ്ഞുതരട്ടെയോ? ഞങ്ങള്‍ പറഞ്ഞു. അതെ. അവിടുന്നു പറഞ്ഞു: ഗോപ്യമായ ശിര്‍ക്ക് ആണത്. നമസ്‌കരിക്കാനായി ഒരാള്‍ എഴുന്നേറ്റു നില്‍ക്കുന്നു. മറ്റൊരാള്‍ നോക്കുന്നു എന്നതിനാല്‍ തന്റെ നമസ്‌കാരത്തിന് അയാള്‍ ഭംഗി കൈവരുത്തുന്നു (ഇബ്‌നുമാജ, അഹമദ്).
പ്രത്യക്ഷത്തില്‍ അല്ലാഹുവിന് വേണ്ടിയാണ് പുണ്യ കര്‍മം ചെയ്യുന്നതെന്ന്‌ തോന്നിക്കും. എന്നാല്‍ അത് മറ്റുള്ളവരെ കാണിക്കാന്‍ വേണ്ടിയാണ് ചെയ്യുന്നതെങ്കിൽ അത് രിയാഅ് (ഗോപ്യമായ ശിര്‍ക്കാണ്) നബി(സ്വ) പഠിപ്പിക്കുന്നു.
സൂറത്തു മാഊനില്‍ നമസ്‌കാരക്കാര്‍ക്ക് നാശം സംഭവിക്കുന്നതിനെ ഖുര്‍ആന്‍ സൂചിപ്പിക്കുന്നുണ്ട്. ഇവിടെ നമസ്‌കരിക്കുന്നവരായിട്ടും അവരുടെ നമസ്‌കാരം സ്വീകാര്യമാവാതിരിക്കാന്‍ കാരണമായി രണ്ട് കാര്യങ്ങള്‍ അല്ലാഹു പറയുന്നു. ഒന്നാമത്തേത് അവര്‍ നമസ്‌കാരത്തില്‍ അശ്രദ്ധരാണ്. രണ്ടാമത്തേത് അവര്‍ മറ്റുള്ളവരെ കാണിക്കാന്‍ വേണ്ടിയാണ് നമസ്‌കരിക്കുന്നത് എന്നതാണ്. അഥവാ അവരുടെ ലക്ഷ്യം അല്ലാഹുവോ അവന്‍ നല്‍കുന്ന പുണ്യമോ അല്ല. മറിച്ച് ഭൗതികമായ താല്‍പര്യങ്ങള്‍ മാത്രമാണ്. എന്നാല്‍ അതിലൂടെ അവര്‍ ചെന്നെത്തുന്നത് ഗോപ്യമായ ശിര്‍ക്കിലേക്കാണ്. അതോടു കൂടി കര്‍മങ്ങള്‍ സ്വീകാര്യമാവാതെ വരുകയും നാശക്കാരായിത്തീരുകയും ചെയ്യുന്നു.
